Skráning í Akureyrarhlaup Íslenskra verðbréfa og Átaks er hafin á hlaupasíðunni. Þeir sem skrá sig þar greiða með korti og sækja síðan keppnisnúmerin í Átak milli kl. 9:00 og 11:00 á laugardagsmorgun.

Einnig verður hægt að skrá sig í Átaki á föstudaginn milli kl. 16:00 og 20:00. Þeir sem skrá sig þar fá keppnisnúmer afhent og geta því mætt beint í startið á laugardagsmorgun.

Við hvetjum unga sem aldna til að vera með í hlaupinu. Minnum sérstaklega á 5 km hlaupið sem vegalengd sem flestir ráða við. Tilvalið að taka krakkana með sér.

Í ár stóð til að endurskoða hlaupaleiðina og fá löggilda mælingu á nýja braut. Mælingamenn FRÍ, sem allir sinna mælingum í aukavinnu, sáu sér hins vegar ekki fært að koma norður fyrir hlaup til að taka út nýju brautina. Í samráði við FRÍ var því ákveðið að hlaupa sömu leið og undanfarin ár. Sú leið var mæld sumarið 2010 og taldist á þeim tíma lögleg braut. Nú hafa reglur hins vegar verið hertar og mælingin stenst ekki þær kröfur sem gerðar eru í dag. Þetta þýðir því miður að árangur manna í hlaupinu fæst að öllum líkindum ekki skráður í afrekaskrár.

Akureyrarhlaupi Íslenskra Verðbréfa og Átaks verður haldið laugardaginn 22. júní 2013. Að venju verður boðið upp á þrjár vegalengdir, 5 km, 10 km og hálfmaraþon sem að þessu sinni er jafnframt Meistaramót Íslands í þeirri vegalend.

Hlaupið er opið öllum og hvetjum við unga sem aldna til að velja sér vegalengd við hæfi og taka þátt. 

Hátt í 200 hlauparar tóku þátt í Akureyrarhlaupi Íslenskra verðbréfa og Átaks í kvöld. Aðstæður voru góðar og tímar fyrstu manna glæsilegir. Í 10 km hlaupinu sem jafnframt var Íslandsmeistaramót í 10 km götuhlaupi sigraði Kári Steinn Karlsson á tímanum 30:18 og var hann aðeins 7 sekúndum frá því að bæta 29 ára gamalt íslandsmet Jóns Diðrikssonar. Annar karla var Þorbergur Ingi Jónsson sem hljóp á 32:14 sem er hans besti tími og áttundi besti tími íslendings í 10 km götuhlaupi. Og þriðji var Ármann Eydal Albertsson á 33:40. Í kvennaflokki sigraði Arndís Ýr Hafþórsdóttir á 36:55 sem er þriðji besti tími íslenskrar konu frá upphafi og í öðru sæti var Rannveig Oddsdóttir á 37:11 sem er sjötti besti tími íslenskrar konu, í þriðja sæti var Sigrún Björk Sigurðardóttir á 42:06.

Einnig var keppt í 5 km hlaupi og hálfmaraþoni. Í 5 km hlaupi karla sigraði Ívar Sigurbjörnsson á 18:58, annar var Guðmundur Þorleifsson á 19:55 og þriðji var Axel Ernir Viðarsson á 21:24. Í kvennaflokki sigraði Selma Sigurðardóttir Malmquist á 21:33, Gígja Gunnlaugsdóttir var önnur á 22:23 og þriðja var Aldís Arnardóttir á 23:56.

Í hálfmaraþoni karla sigraði Arnar Pétursson á 1:13:54, annar var Stefán Viðar Sigtryggsson á 1:24:26 og þriðji var Ásgeir Sverrisson á 1:27:51. Í kvennaflokki sigraði Ásdís Káradóttir á 1:36:54, önnur var Sigríður Einarsdóttir á 1:38:37 og þriðja var Anna Berglind Pálmadóttir á 1:41:59.

Hér má sjá tíma allra sem hlupu. Þeir sem hafa ábendingar varðandi úrslitin geta sent þær á netfangið rannodd@hi.is